Amat ë Dupiööc, Bäny ë Wut ku Mëdhiëëth baai Adelaide
February 22nd, 2009Kol 22, 2009
Agɛ̈ɛ̈t: Kuɔl Baak
AKöl nïn 22, pen rou, ruöön 2009, dupiööc ë Thuɔŋjäŋ, Bäny ë Wun Kɔɔc Cɛɛm Pancol ku Mëdhiëëth Cɛɛm Pancol tɔ̈u baai Adelaide aa ke cë nyuc bïk latueŋ ë Panpiööc ë Thuɔŋjäŋ Adelaide jääm yic. Panpiööc ë Thuɔŋjäŋ ee gut cök piny baai Adelaide wäär ruöön 2005, aköl nïn 22 pen rou. Käŋ kek cë jääm yiic amat kën yic aa leŋ yiic:
1. Wël jör dupiööc ku tɛ̈ bï dupiööc ya kuɔny kök nhial thïn
2. Juëŋ bï Akut mac piööc ë Thuɔŋjäŋ juak yic.
3. Akuën ë wëëu bë ya kuööt ku raan bë ke ya kuööt
4. Kä jör Akut mac piööc ë Thuɔŋjäŋ
1. Wël jör dupiööc ku tɛ̈ bï dupiööc ya kuɔny kök nhial thïn
Dupiööc juääc aa cë ke nhïïm miëët bei piööc yic ku nawën thiëc keek go kɔɔc kɔ̈k lueel lä ka leŋ loiloi keen cë ke pɛɛt cin wei ku lueel kɔɔc kɔ̈k lä ka cï mïth ye piŋ thook - ku keya, a yekä tïŋ ka cïn kë loikä nhom.
Bäny ë wut ku mëdhiëëth aa cë jal bɛ̈n bëër ku luelkä alä dupiööc aa bë kony kalä:
a) Aa bë ya dɛɛt puöth bïk röt juaar
b) Kɔɔc juääc ŋic kuɛ̈n ku gän ë Thuɔŋjäŋ aa bë gät rin piny bïk rëër ke ye cök cë tɔ̈ɔ̈u bë kɔc aa cööt thïn tɛ̈ leŋ yen dupiöny liu.
c) Wun kɔɔc Pancol a bë dupiööc cë luui apɛy ku mïthabuun cë ŋiɛc kuen ya gäm ariöp ruöön thok ebën yic.
d) Mëdhiëëth aa bë ya juar bïk dupiööc ya kony wëëu cäth
dh) Dupiööc aa dhil mëdhiëëth ya lɛ̈k tɛ̈ leŋ yen manh këc ɣëët panpiööc
e) Dupiööc nhiar yeen bïk ya piööc thäät lik ku jëlkä aa dhil puöl bïk ya looi keya.
ɛ) Dupiööc ë Thuɔŋjäŋ ebën (Rek, Agaar, Bor ku Padaaŋ) aa dhil ke yiic mat - na cɔkalɔn ye kek piööc ɣɔ̈n juääc yiic - rin bïk röt ya kony tɛ̈ leŋ yen ɣɔ̈n ë piööc cï dupiööc lïk thïn.
g) Mïthabuun cë thök Panpiööc ë Thuɔŋjäŋ aa dhil ya dɛɛt puöth bïk röt mat dupiööc yiic.
ɣ) Na cë ruöön thök, ka kë cï mïth ŋic a dhil deet thok rin bë dupiööc ya dɛɛt puöth ku ŋɔ̈thkä piööc tueŋ.
i) Dupiööc ku kɔɔc mac wël ë piööc aa dhil röt ya theek.
2. Juëŋ bï Akut mac piööc ë Thuɔŋjäŋ juak yic.
Wɛ̈t kën a cë tɔ̈ɔ̈u - a këc jääm yic.
3. Akuën ë wëëu bï mëdhiëëth ya juaar ku raan bë ke ya kuööt
A cï mëdhiëëth lueel lä pan tök a bë ya juaar $100 ruöön yic. Wëëu aa bï raan muk wëëu Panpiööc ë Thuɔŋjäŋ ya kuööt ku tɔ̈ɔ̈u keek.
4. Kä jör Akut mac piööc ë Thuɔŋjäŋ.
Wɛ̈t kën a cë tɔ̈ɔ̈u aya - a këc jääm yic.
Amat dɛ̈d a bë jal bɛn cɔɔl bë kä wën cë tɔ̈ɔ̈u ku wël kɔ̈k alɔŋ Thuɔŋjäŋ jal bɛn jääm yiic thïn.